Түркістан облысының полициясы қызғалдақ терген қазақстандыққа қатысты тергеудің мән-жайын айтты, - деп хабарлайды Massaget.kz тілшісі.
Оқиғаның мән-жайы
Түркістан облысының Ордабасы ауданында түсірілген видео әлеуметтік желілерде тарап кетті. Кадрларда белгісіз біреу гүл жұлып жатқаны көрінеді. Ал сирек кездесетін гүлдерді жинауға заңмен тыйым салынған.
Айта кетейік, жабайы қызғалдақтар 4 жылдан 7 жылға дейін жерде сақталуы мүмкін тұқым арқылы көбейеді. Гүлді жұлса, тұқымы да жоғалады, осылайша жаңа гүл шығуы сирей түседі.
Қызғалдақ Қызыл кітапқа енген. Оны жұлғаны үшін ҚР ҚК-нің 339-бабына сәйкес қылмыстық жауапкершілік көзделген. Бұл үшін 3000 АЕК-ке дейін (11 796 000 теңге) айыппұл не қоғамдық жұмыстарға 800 сағатқа дейін тарту түріндегі жаза не 3 жылға дейін бас бостандығын шектеу/айыру жазасы берілуі мүмкін.
Полиция пікірі
Түркістан облысы Полиция департаменті мәліметінше, қызғалдақ жұлған қазақстандық істеген ісін мойындаған.
"Әйелге қатысты ешқайда кетпеу және дұрыс мінез-құлық туралы бұлтартпау шарасы таңдалды. Қазір барлық мән-жайды анықтауға бағытталған іс-шаралар жүргізіліп жатыр", - деп жазылған полицияның Tengrinews.kz-ке берген жауабында.
Аймақ прокуратурасы мәліметінше, сот сараптамасы тағайындалған, осы арқылы жұлынған гүлдер, расында да, Қызыл кітапқа енген-енбегені анықталады. Оның нәтижесі бойынша Шымкент тұрғынының әрекетіне де құқықтық баға беріледі.
Аптаның басты оқиғалары мен пайдалы видеоларды көру үшін YouTube арнамызға жазылыңыз
Ж. Қадыржанова