Балаңызбен бірге көлікпен сапарға шығуды жоспарладыңыз ба? Сапарыңыз жайлы әрі қауіпсіз болуы үшін алдын ала қамданыңыз. Мамандар нені ескеру керек екенін айтты, - деп хабарлайды Massaget.kz тілшісі Almaty.tv-ға сілтеме жасап.
Жолға шықпас бұрын көлігіңізді дайындаңыз:
- Дөңгелектердегі ауа қысымын тексеріңіз.
- Жарық, тежегіш, бұрылыс шамдарының жұмысын тексеріңіз. Бұл – қауіпсіздіктің басты элементтерінің бірі.
- Тежегіш жүйесінің жұмысын және әйнек тазалағышты тексеріңіз. Бұл қолайсыз ауа райы кезінде өте қажет.
- Жолды жақсы көру үшін айна баптауларын ретке келтіріңіз.
- Балаларға арналған автоорындық дұрыс орнатылғанына, бала қауіпсіздік белдігін таққанына назар аударыңыз.
Жас ерекшеліктеріне қарай балаларды тасымалдау ережелері:
- 1 жасқа дейін
Нәрестені қозғалыс бағытына қарсы орнатылған автобесікпен (0+ санаты) тасымалдау керек. Бесікті алдыңғы орындыққа да, артқы орындыққа да қоюға болады, алдыңғы орындыққа қойған жағдайда қауіпсіздік көпшігін ажырату керек.
- 1 жастан 7 жасқа дейін
Бұл жастағы балалар бойы мен салмағына сәйкес келетін балаларға арналған автоорындықта отыруы керек. Алдыңғы және артқы орындыққа да отырғызуға рұқсат етіледі.
- 7 жастан 11 жасқа дейін
Егер баланың бойы 150 см-ден жоғары болса, стандартты қауіпсіздік белдігін пайдалана аласыз немесе автоорындық, бустерді пайдалану қажет.
- 12 жастан бастап
Кәдімгі қауіпсіздік белдігін пайдаланып, кез келген жолаушылар орнында тасымалдауға рұқсат етіледі. Қосымша құрылғылар қажет емес.
Аптаның басты оқиғалары мен пайдалы видеоларды көру үшін YouTube арнамызға жазылыңыз
Ж. Қадыржанова